HİRİ BIRAYİ KUÊN BINÊ HORÊSİ

Çolig dı zımıston zaf çetın viyereno ra. Nızdiyê yo metrı, rê rê metrı ra zediyer vor varena, bena qum quç. Ê insoni ki heywonon kiyên wê, zımıston dı zaf zuar gıneno inan. Zımıston dı teyr turi zi nıvêciyên teber. İnson biyê lekonon niêşkiyen vêj teber niye zi çik bıker. Zımıston, insoni tawıkonê xu erzên xu duêş u şin kue ra velg oni doni heywonon. Wext vêr dı zê ınka subê çi çiniv, milet pıxeri dı adır kerdên we u xu kerdên germın.

Ruejêk Şabedin, Ehmed u Eli sersıwê rew wırzên we, nımajê xu kên, separê xu wên, lekononê xu kên xu pay u şin gumı. Şabedin ho vernido, Ehmed ho yi dıma u Eli zi ho yın ra dıma yeno. Gumê yin zi ho Qerqajon do. Qerqajon dew ra xêlêk duri yo. Hiri embazi hêdi hêdi yên resên sêr dereyi. Bıron zereyê dereyi dı xu ri yo pırd vıraşto, tımo tım yên sêr in pırd ra şini. Wexto ki hiri bırayi resên sêr dereyi, tij huma newı vejiyena. Eli bıronê xu ra vonu:

-Vor zaf a, biyerên ma xu ri pê mergê ağon ra şı. Ma ınka ıno kef ri xu war kır, huma niker horês çi biyer. Desta ma bin horês dı bımon! Ino semed ra biyerên ma xu ri pê mergê ağon ra şı.

Şabedin u Ehmed oniyên yo binon ra u voni:

-Eger ma reyna ita ra agêr, ma kuên erê. Ma xu dere’r kên war ma lez şin. Mereq mek bıro tawê niben, ma hêdi hêdi gomonê xu erzên u ma şin.

Hirı bırayi kuên tiyekışt u hê kef ra yên war. Tersê horês ver hêdi hêdi gomonê xu erzên. Hin tay munen bırêsê dere, lıngê Eliyi rıskiyena ra u Eli gınen ‘erdır u qêren. Wexto ki qêri gınena Eli ri, Şabedin u Ehmed tam awır nıdon, oniyên pê xu ra eger horês qılya ra ho hêt yin ra yeno. Şabedin qêren bıronê xu ra von:

-Vazdên horês umı, ınka ma bın dı munên.

Hirı bırê semêd vazdayiş ra temom yes xu nikên, horês yen resên yin u hiri hemı bırayi zi bınê horês dı munên. Horês hirı hemı bıron zi miyon bıron ra, miyon keron kuçukon ra ben heton vêr deri. Teref Allê ra hin tay munen horês zereyê dereyi reso, uca vêr dereyi dı vındên. Hirı hemı bırê zi bin horês dı monên.