HER Çİ MEHSUN O

Warê Mergmir wareyêko berz u bılınd o

Qu mehsun o, deşt mehsun a gul mehsun a

Gavunti ağati ya paşati ya

Naxır mehsun o, monga mehsun a, guelık mehsun a

Şone merd pes terıkna

Purt mehsun o, hevrıng mehsun o, mueşna mehsun a,

Ni adır mend, ni tarım ni’z munqal

Çongıl mehsun o, resnı mehsun o, palon mehsun a

Mewsımi bediliyabi ni omnon belu yo ni’z zımıston

Vor mehsun a, kuelbıza mehsun a, zaraja pel şıkti mehsun a

Berekı qediyayo, şıkır nimendo

Ciyew mehsun o, kesı mehsun o, dolet mehsun a

Niweşi u jon biyo ziyed

Hekim mehsun o, dermon mehsun o, şifa mehsun a

İnsonti ferikiya nimenda

Der ciron mehsun o, heval hogır mehsun o, duesti bırati mehsun a

Taat u ibadeti qet nibeni

Sejdı mehsun o, kıble mehsun o, comi mehsun a

Fieki zey ver niya

Dar mahsun a, pel mehsun o, vıl mehsun a

Emır biyo kılm merg biyo ziyed

Gonger mehsun o, meyit mehsun o, kefen mehsun o

Çıqas şiyero emır beno kılm

Emır mehsun o, qeder mehsun o, emel mehsun o

Hini desti mı lerzeni, doqê mı şına, çımi mı ğemom keni

Ez mehsun o, tı mehsun a, eşqê zerey mı mehsun o

Ez hini qayil a bajar ra duri bıperi zey Ebuzeri

Pêxember mehsun o, reya mehsun a, ummet mehsun a…