Dayê dayê lê şêrînê
Dayê dayê wefakarê
Dayê dayê cefakarê
Li ber dila tu şêrînî
Mîna kulîlkên buharê
Xanî bi te dibin ava
Tu hêjayê pesn û nava
Bê te herder şeva reş e
Tu yî nûr û ronya çava
Dayê dayê belengazê
Hesret bû ku tu têr razê
Lorîna te pir xweştir e
Ji bilûr û dengê sazê
Dayê bê te zarok mest in
Sutûxwar û hem bindest in
Dema ku tu ji nav me çû
Em bûn xizan em şikestin
Te şev bêyî xew buhurand
Ez girîyam te j-mir lorand
Hem bi şev û hem bi rojan
Dergûşa min te dihejand
Li ser min te sipî kir por
Te pir kişand zehmet û zor
Dayê hêsrê van çavê min
Zuha dikir te j-hawîrdor
Zarok bûm bêhêz û mecal
Şîrê safî paqij zelal
Ey dayikê te dida min
Şev û rojan meh û demsal
Hezkirina te bû jiyan e
Himêza te çi derman e
Yadê jibonî zaroka
Tu hem av û hem jî nane
Dema nexweş dibûm dayê
Li ser min tu diket tayê
Hêsirê te dibariyan
Wek baran û wekî bayê
Dayê te pir kişandî jan
Welleh bê te ta'l e jiyan
Kesê te'dê li te bike
Mehrûm dimîne ji ûjdan
Qedrê diya baş bizanin
Bera ji we nekin gazin
Ma li cîhan û axretê
Serfîrazyê hûn naxwazin
Gelî bajarî û gundiya
Neşkînin hûn qelbê diya
Lewra dayik mezintirin
Ji serok û ji qadiya
Dayê dayê lê şêrînê
Salih feqîr ji Mêrdînê
Tu carî te jibîr nakim
Heta sax bim li vê dinê