Filistin Nablus dı dewêk ser a du biyên berz u vıla.
Serra 1948i… Filistin Nablus dı dewêk ser a du biyên berz u vıla. Vengê tıfıngan her deqa biyên nızd u zêd. Şarê dew, biçare u bikes mendbi. Mecbur maneni dewa xu terk keni. Ino weziyet, Şeriaya Ğerb, Gazze, Ramallah, El-Xelil u her cayê Filistin dı zêpi bı. Yahudiyo wehş omeyên, dest nayên keye, erd, bexçe u hegayanê Filistinıcanê Bısılmanan ser. O wext, Filistinıcan dest dı nê yo silah, nê yo tedarik, nê zi yo imkan estbı. Ay ra mecbur mendên keyeyê xu terk kerdên u biyên macir. Ini dewıci zi heta teberê dew niafterên bıoni xu dıma. Miyanê ıni dewıcan dı yo dadiya con bibi. Hema serra ay niqediyabi zewıciyabi. Gerguşê ay hema hiri aşme bı. Pêçek dı bi u dadiya ey wı pê şıtê xu lonên. Ina dadi zi wext vengê tıfıngan şınawıt recifiya, ters kot zerra ay, qırıka ay bi zuwa. O ki omê ay vir, pê vazdayiş hetê gerguşê xu ra şi. Gerguşê ay, miyanê beşiga xu dı rakote bı. Tı vatên belka sineyê cıniyêk qefsıngê ay ra veciyeno. Wext, teng bı. Siyonisto har omebı bınê dew. Dêstır çı kuya ay dest guret wa belka qıcê ay o. Pışt pêçek ra u keye ra veciya. Qasê dı seati a u dewıci pê vazd şiyi. Nê a nê zi dewıci bini nioniyeni xu dıma. Vatên belka mı gerguşê xu xelısnayo. Zobina çiyêk nê ğemê ay bı nê zi omên virê ay. La hesıri çımi ay çılk çılk omên war, lacıka ay ra rıciyên fistanê ay u biyên hiy. Fekê ay ra teyna ına dua şiyên hetê ezmanan: “Homawo, Homawo! Oladê mı bıpaw u mehfeze bıker!” Wext, resayi cayêko hira u biters xu arqiliya. Pêçek ra çik veng niveciyên. Nê berme nê zi heshelaw. Desti ay recifiyayi, lewi ay lerzayi u çımi ay biyi tari… Lezabez pêçek kerd a; la çı bıvino! Verardê ay dı gerguşa ay nê, yo balişna estbi. O wext, wext vındert; her çi bı lêl, bi tengnefes… Dıma yo qeri gına puri… İnsani, cınawıri, teyr u turi, kaş u kendali, ezman u erd omeyi hewarê ay… La siyonisto har, yahudiyo wehş bıb kerra, bıb kerr, bıb kor u bıb lal… ✍ Yusuf ARİFOĞLU Bınê Dara Zeytun Dı Bınê Dara Zeytun Dı Yo Dadi, Yo Gerguş u Hêvi Yo Dadi, Yo Gerguş u Hêvi 36 Waşt tepiya bıgeyro a; la hin tu imkan çinbı. Ay dıma zulım, kıştış, vêşnayiş u wehşet estbı. Ay ver dı zi her çi bıbı tari u çinbiyaye… … Benate ra serr u serr ra wext viyerti… Surgun, qamp, bikesi, biçareyi u berme… Heyatê ay, roci ay u şewi ay hına viyerti. La her roc, newe ra pê yo hêvi bi aya; her şew pê yo dua u waştış xu ra şi: “Eceb, lacê mı mende yo?” Decê ay nibi sıst; la hêviya xu zi nibırna. Çunki ay hına yo Homayo Pil ri baweri ardbı heme derdi bıbiyên laser ay bıfatısnên, bıbiyên adır ay bıvêşnên rına zey Hezreti Nuhi u Hezreti İbrahimi xelas u mijdon ri yo ber bıbı. Homa ra hêviya xu nibırna. Şewa tari, roco teng u halo biçare dı ına hêvi ay ri biyên çıla, hirayi u çare… Benate ra tam vist serr viyertbı… Rocêk zey yari, zey xap u zey ğıyal xeberêk gına goşê ay u zerra ay kerd wenık: “Lacê tu nimerdo u weş o!” La, qala peyin ra dıma rına bi tengnefes, gıraniya vist serri vercu omi zerra ya ser a nışt ru, desti biyi sıst u lewi biyi zuwa. “Lacê tu, yo keyeyê Yahudi do. İnan wı kerdo weye u pil. Nameyêko bin nayo pawa u xu qıcê inan zano.” Dadi ra hes bıriya… Çımi ay biyi zuwa u leşa ay zey pelê payiz şiyên ti. Lacê ay vist serr vercu dest ra xıc bıbı şıbı. Vist serr, ey ri berma u ey ser a hêviya xu nikerd vind. Eka zi zana lacê ay weş o u ho cuyeno; la ına dor zobina yo heyat koto benateyê inan. Heyato wehş, keyeyo siyonist, hişa kafır u zulmo bihesab… Ay fekê lacê xu ra tu kelime nişınawıtbi. Seni vano “Daye!” Ay ri hesret mend bi. Seni buli kerd, seni kot pay nidibi. Wext neweş kot niguretbı xu verard, ey ri niberma bi. Mırd a mırd nilonabı… La her çi ra gıran… Ina vist serr a ha rayırê lacê xu pawena, xebera xeyr pawena… Eka lacê ay esto… La ay nişınasneno… Ay u heme Bısılmanan duşmen zano. Serê çoqanê xu ser kot erd… Vercu wehşo a, gerguşê ay ra duri finabı. Eka rına ê wehşi, zalımi u gunveri lacê ay, ay ri kerdbı ğerib, nêyar u duşmen… Rına zerra ay dı cayêk dı yo hêvi pıl da, bi gani… Kam zano belka rocêk rayırê inan gınena yobinan, yeni tiçım u pê kelime u vateyan nê pê heskerdış u hesretê zerr yobinan şınasnên… Duşmen, belka eşkeno inan bıfetılno, keyeyê inan bırışno, dewa inan bıveşno, malê inan talan bıkero; dadi olad ra, bırayi bıra ra, cıni u miyerde ra bıvısno… La duşmen nieşkeno zerr ser a runışo, Hiş ri tehekum bıkero, Rehm pize ra veco, Sebır u deyağ ra duri bıfino, Verniya heskerdışi bıgero U verê hêviya seserran bıgero. Sarevedartışo heq, vervinayişo mehkem u mıcadeleyo raşt Rê rê sebır o, Rê rê weyekerdışê hêvi yo, Rê rê versiya yers, heyf u qehıriyayiş dı mılê xu çot nikerdış o,Rê rê dec, keder, tada u musibet çendêk zêd beno wa bıbo mehfezeyê imani yo, bawerkerdış o u insan mendış o. U HÊVİ… Şewa tari çendêk derg bena wa bıbo wext destê sıba dı roc eşt nê tari maneno nê ters… Her ca beno roşn, beno a, beno saya, beno germ u beno weş… Hêvi zi hına va! Barê herb, zulım, surgun, qırkerdış, vêşnayiş, dert u keder her tım dadiyan, tutan u bikesan ri kuwena; la hêvi zi her tım hesıran, baweriyan u sinayişanê dadiyan dı weye bena; qey xelas, serfırazi u azadi bena mijdon.